Sot opinioni në vend dhe më gjerë u trondit me informacionin se për t’u avancuar femrat në Armatën e Republikës së Maqedonisë së Veriut duhet të dhurojnë shërbime seksuale ndaj gjeneralëve. Përveç korrupsionit aktiv, që është i dukshëm dhe që ka marrë përmasa të frikshme, sipas të gjitha statistikave edhe nga institucionet relevante ndërkombëtare, tash po del se në ARM kërkohen edhe favore seksuale nga ushtaret dhe eproret femra. Një gjë të këtillë sot me zë e pohoi ministrja e mbrojtjes, Sllavjanka Petrovska, duke u arsyetuar se është hapur procedurë penale dhe se në atë procedurë nuk ka të drejtë të përzihet.

Maqedonia e Veriut, si një vend anëtar i NATO-s, duhet të jetë shëmbëlltyrë e disiplinës dhe përfaqësimit të drejtë dhe adekuat gjinor, racor dhe etnik. Fatkeqësisht, Armata e Maqedonisë së Veriut, prej së cilës varet siguria e shtetit dhe jetës së qytetarëve në Republikën e Maqedonisë së Veriut, po del se është shndërruar në një ambient toksik dhe të pasigurt për gjininë femërore. Që të jetë habia ende më e madhe, me këtë institucion udhëheq një grua, e cila deri më tani e ka fshehur këtë gjë dhe nuk ka folur haptas për skandalet seksuale që e kanë kapluar këtë dikaster.

Departamenti i Mbrojtjes i partisë politike AlternAtivA kërkon që sa më shpejt të zbardhen rastet e këtilla dhe gjeneralëve që janë të akuzuar për vepra të këtilla përgjithmonë t’u ndalohet veprimtaria dhe puna në të gjitha institucionet e sigurisë së vendit.

Departamenti i Mbrojtjes – AlternAtivA

Shkup, 27 tetor 2023